फ्लोरिडा, अमेरिका | वृत्तसंस्था
जगप्रसिद्ध WWE रेसलर हल्क होगन यांचे वयाच्या ७१व्या वर्षी हृदयविकाराच्या झटक्याने निधन झाले. गुरुवारी (२४ जुलै २०२५) सकाळी फ्लोरिडातील त्यांच्या राहत्या घरी त्यांनी अखेरचा श्वास घेतला.
कार्डियाक अरेस्टमुळे निधन
TMZ स्पोर्ट्सने दिलेल्या माहितीनुसार, गुरुवारी सकाळी हल्क होगन यांच्या फ्लोरिडा येथील क्लिअरवॉटर येथील निवासस्थानी आपत्कालीन वैद्यकीय सेवा पाचारण करण्यात आली होती. कॉलमध्ये ‘कार्डियाक अरेस्ट’ बाबत माहिती देण्यात आली होती. त्यानंतर पोलीस आणि आपत्कालीन वैद्यकीय कर्मचारी घटनास्थळी दाखल झाले. त्यांना स्ट्रेचरवरून रुग्णवाहिकेत नेण्यात आले.
WWEने व्यक्त केला शोक
हल्क होगन यांच्या निधनावर शोक व्यक्त करत WWEने सोशल मिडिया प्लॅटफॉर्म X (माजी ट्विटर) वर म्हटले, “WWE हॉल ऑफ फेमर हल्क होगन यांच्या निधनाची दुःखद बातमी कळली आहे. १९८० च्या दशकात WWE चे जागतिक स्तरावर नाव पोहचवण्यात होगन यांचे मोलाचे योगदान होते. त्यांच्या कुटुंबीयांना, मित्रांना आणि चाहत्यांना WWE कडून सहवेदना.”
अलीकडेच झाली होती मोठी हार्ट सर्जरी
US Weekly च्या माहितीनुसार, काही आठवड्यांपूर्वीच होगन यांची मोठी हृदयशस्त्रक्रिया झाली होती. त्यानंतर त्यांच्या प्रकृतीविषयी अफवा पसरल्या होत्या. त्यांच्या पत्नी स्काय यांनी या अफवांना फेटाळून लावत सांगितले होते की, “हल्क यांचे हृदय पूर्णपणे ठणठणीत असून ते व्यवस्थित बरे होत आहेत.”
‘हल्क होगन’ कोण होते?
हल्क होगन यांचे खरे नाव टेरी जीन बोलिया होते. त्यांचा जन्म ऑगस्ट १९५३ मध्ये जॉर्जिया राज्यातील ऑगस्टा येथे झाला होता. फ्लोरिडाच्या पोर्ट टॅम्पा भागात ते लहानाचे मोठे झाले. वयाच्या अवघ्या २४ व्या वर्षी, १९७७ मध्ये त्यांनी कुस्तीमध्ये व्यावसायिक पदार्पण केले. काही काळातच ते त्यांच्या ‘हल्क’ नावामुळे ओळखले जाऊ लागले.
WWEतील दमदार प्रवास
हल्क होगन हे त्यांच्या लाल-पिवळ्या पोशाखात १९८० च्या दशकातील WWE चे सर्वात लोकप्रिय रेसलर ठरले. त्यांनी सहा वेळा WWE चॅम्पियनशिप जिंकली होती. १९८४ मध्ये ‘द आयर्न शेक’ ला पराभूत करत त्यांनी WWE चॅम्पियनशिप जिंकली आणि ‘द रिअल अमेरिकन’ अशी ओळख कमावली. त्यानंतर ते MTV वरील ‘WrestleMania’ तसेच ‘Saturday Night Live’ शोमध्येही झळकले.
‘रोडी रॉडी पाइपर’, ‘किंग कॉंग बंडी’ आणि ‘अल्टिमेट वॉरिअर’ यांसारख्या दिग्गज प्रतिस्पर्ध्यांशी झालेली त्यांची सामने WWE इतिहासात अजरामर आहेत.
हॉल ऑफ फेममध्ये गौरव
२००५ मध्ये हल्क होगन यांना WWE हॉल ऑफ फेममध्ये समाविष्ट करण्यात आले होते. त्यानंतर २०२० मध्ये ‘न्यू वर्ल्ड ऑर्डर’ या गटाचा सदस्य म्हणून त्यांना पुन्हा एकदा हॉल ऑफ फेममध्ये गौरवण्यात आले.
हल्क होगन यांच्या निधनाने कुस्तीविश्वातील एक तेजस्वी अध्याय संपला असून त्यांची आठवण जगभरातील चाहते कायम ठेवतील.