६ वर्षांपूर्वीही केलं होतं असंच कृत्य, मात्र कारवाई झालीच नव्हती
नवी मुंबई : डोंबिवली जवळील ग्रामीण भागातील एका जिल्हा परिषद शाळेत एक धक्कादायक घटना घडली आहे. येथे शाळेच्या मुख्याध्यापकाने सहा वर्षाच्या चिमुकलीवर लैंगिक अत्याचार केल्याचा प्रकार उघडकीस आला आहे. हा धक्कादायक प्रकार समोर आल्यानंतर मानपाडा पोलीस ठाण्यात मुख्याध्यापक महेंद्र खैरनार विरोधात गुन्हा दाखल करण्यात आला असून त्याला बेड्या ठोकण्यात आल्या आहेत. पोलीस या प्रकरणाची चौकशी करत आहेत.
मिळालेल्या माहितीनुसार मुख्यध्यापकाने दोन दिवसांपूर्वी हे कृत्य केले होते. घडल्या प्रकाराबाबत पीडित मुलीने कुटुंबियांना सांगताच कुटुंबीयांनी थेट मानपाडा पोलीस ठाणे गाठले. पोलिसांनीही प्रकरणाचे गांभीर्य लक्षात घेत मुख्याध्यापकाविरोधात गुन्हा दाखल केला. गुन्हा दाखल होताच पोलिसांनी तत्काळ या मुख्याध्यापकाला अटक केले. महेंद्र खैरनार असे या मुख्याध्यापकाचे नाव आहे.
दरम्यान या आधी 2019 साली ग्रामस्थांनी महेंद्र खैरनार मुलींसोबत गैरवर्तन करत असल्याची तक्रार गट विकास अधिकाऱ्याकडे केली होती. तसेच त्या तक्रारीत मुख्याध्यापकाची बदली करण्याची मागणी करण्यात आली होती. मात्र प्रशासनाने दुर्लक्ष केल्याचा आरोप ग्रामस्थांनी केलाय. या घटनेनंतर परिसरात संतापाची लाट उसळली असून या प्रकरणाची जलदगतीने चौकशी करावी तसेच या प्रकरणी पीडित मुलीला न्याय द्यावा अशी मागणी केली जात आहे.
मानपाडा पोलीस स्थानक पुढील तपास करत असून आरोपी शिक्षकाविरुद्ध योग्य ती कायदेशीर कारवाई करण्यात येत आहे. अशी माहिती ACP सुहास हेमाडे यांनी दिली आहे