मुंबई | प्रतिनिधी
मुंबई महानगरपालिकेच्या आगामी निवडणुकीपूर्वी महाविकास आघाडीमध्ये अंतर्गत तणाव पुन्हा उफाळला आहे. काँग्रेसने मुंबई महापालिका निवडणूक स्वबळावर लढवण्याचा निर्णय घेतला असून, काँग्रेस ना उद्धव ठाकरे यांच्यासोबत, ना राज ठाकरे यांच्यासोबत निवडणूक लढवणार असल्याचे काँग्रेसचे मुंबई अध्यक्ष भाई जगताप यांनी स्पष्टपणे जाहीर केले आहे.
भाई जगताप यांनी म्हटलं, “आम्ही कोणत्याही परिस्थितीत शिवसेना (उद्धव गट) किंवा मनसेसोबत निवडणूक लढवणार नाही. मी मुंबई काँग्रेस अध्यक्ष असताना हाच निर्णय घेतला होता आणि आजही आमच्या पक्षाच्या राजकीय कामकाज समितीने त्यालाच दुजोरा दिला आहे. आम्ही हा निर्णय वरिष्ठ नेते रमेश चेन्निथला यांच्या उपस्थितीत घेतला आहे.”
‘ही कार्यकर्त्यांची निवडणूक, नेत्यांची नाही’
जगताप पुढे म्हणाले, “स्थानिक स्वराज्य संस्थांच्या निवडणुका या नेत्यांच्या नव्हे, तर कार्यकर्त्यांच्या लढाया असतात. काँग्रेसचे कार्यकर्ते १४० वर्षांपासून पक्षाचा झेंडा अभिमानाने उचलून ठेवत आहेत. त्यांनाही आपली ताकद दाखवण्याची, निवडणुकीत उतरण्याची संधी मिळायला हवी. त्यामुळे ही लढाई आम्ही स्वबळावर लढणार आहोत.”
राज ठाकरेसोबत युतीचा प्रश्नच नाही
“राज ठाकरे यांच्यासोबत जाण्याचा प्रश्नच उद्भवत नाही. महाविकास आघाडी जेव्हा स्थापन झाली, तेव्हा उद्धव ठाकरे हे शिवसेनेचे एकमेव नेते होते. आता दोन शिवसेना निर्माण झाल्या आहेत — त्यामुळे त्यांचा निर्णय त्यांचाच अधिकार आहे. पण काँग्रेस त्यात ओढली जाणार नाही,” असेही जगताप यांनी स्पष्ट केले.
‘स्थानिक नेत्यांनाच निर्णय घेऊ द्या’
जगताप म्हणाले, “मुंबईतील परिस्थिती मुंबईकरच जाणतात. त्यामुळे मुंबईतील स्थानिक काँग्रेस कार्यकर्त्यांनाच उमेदवारी आणि युतीबाबतचा अंतिम निर्णय घेऊ द्या. आम्ही स्थानिक आहोत आणि त्यामुळे मुंबईत काँग्रेस पक्ष पूर्ण ताकदीने स्वबळावरच निवडणूक लढवेल.”
या घोषणेमुळे मुंबईतील आगामी निवडणुकीच्या राजकारणात नवे समीकरण निर्माण झाले असून, महाविकास आघाडीतील अंतर्गत मतभेद आता उघडपणे चव्हाट्यावर आले आहेत.