मुख्य प्रवक्ते खासदार संजय राऊत ‘गप्प’; ठाकरे बंधूंचा ‘सबुरीचा सल्ला’?
मुंबई | विशेष प्रतिनिधी
राज्यात नोव्हेंबर ते जानेवारी या कालावधीत पार पडणाऱ्या स्थानिक स्वराज्य संस्थांच्या निवडणुकांच्या पार्श्वभूमीवर शिवसेना (उद्धव बाळासाहेब ठाकरे) पक्षाचे मुख्य प्रवक्ते आणि राज्यसभेचे खासदार संजय राऊत यांच्या बोलण्यावर ‘निर्बंध’ आणल्याची चर्चा सध्या राजकीय वर्तुळात जोर धरत आहे.
राऊत यांनी नुकतेच प्रसिद्ध केलेल्या पत्रात “वैद्यकीय कारणास्तव गर्दीत मिसळण्यावर डॉक्टरांनी बंदी घातली आहे, मी नवीन वर्षात पुन्हा भेटेन” असे म्हटल्याने त्यांच्या अचानक शांततेचा राजकीय अर्थ लावला जात आहे.
स्थानिक स्वराज्य निवडणुकांचा रणसंग्राम
राज्यात येत्या दोन महिन्यांत एकूण २४७ नगरपरिषदा, १४७ नगरपंचायती, ३२ जिल्हा परिषदा, ३३६ पंचायत समित्या आणि २९ महानगरपालिका या स्थानिक स्वराज्य संस्थांच्या निवडणुका पार पडणार आहेत. या निवडणुकांमध्ये ठाकरे बंधूंना—उद्धव ठाकरे आणि राज ठाकरे—महायुतीपासून (शिंदे गट, भाजपा, अजित पवार गट) स्वतंत्र लढा देण्याची रणनीती आखावी लागणार आहे. त्यामुळे प्रत्येक वक्तव्याचे राजकीय वजन वाढले असून, राऊत यांच्या वक्तृत्वशैलीमुळे पुन्हा वाद निर्माण होऊ नये, अशी खबरदारी ठाकरे बंधूंनी घेतल्याचे बोलले जात आहे.
मराठीच्या मुद्द्यावर ठाकरे बंधूंची एकजूट
मुंबई महानगरपालिका पुन्हा ठाकरेंच्या ताब्यात यावी, या उद्देशाने मराठी अस्मितेच्या मुद्द्यावर उद्धव ठाकरे आणि मनसे अध्यक्ष राज ठाकरे एकत्र आले आहेत. या मैत्रीमुळे सत्ताधारी शिंदे-भाजप गटात हलकल्लोळ माजला आहे.
मुंबई महानगरपालिकेच्या ठेवी आणि निधींच्या वापराबाबत माजी मुख्यमंत्री एकनाथ शिंदे यांच्यावर ठाकरे गट हल्लाबोल करणार असल्याचे संकेत आहेत.
याच पार्श्वभूमीवर राऊत यांचे आक्रमक वक्तव्य निवडणुकीच्या काळात ‘धोका’ ठरू नये, म्हणूनच त्यांना शांत राहण्याचा सल्ला देण्यात आल्याची चर्चा सुरू आहे.
राज ठाकरे यांचा ‘नमो केंद्रां’वर इशारा
राज ठाकरे यांनी अलीकडेच मुंबईतील पक्ष मेळाव्यात राज्य सरकारवर टीका करताना म्हटले की —
“शिवनेरी, रायगड, प्रतापगड यांसारख्या किल्ल्यांवर ‘नमो केंद्र’ उभारले तर ती फोडली जातील. या किल्ल्यांवर फक्त छत्रपती शिवाजी महाराजांचेच नाव असावे.”
या वक्तव्यामुळे ठाकरे बंधूंची मराठी अस्मिता पुन्हा केंद्रस्थानी आली आहे.
राज ठाकरे यांच्या भूमिकेला उद्धव ठाकरे यांचा अप्रत्यक्ष पाठिंबा असल्याचे राजकीय निरीक्षकांचे मत आहे. त्यामुळे ठाकरे घराण्याचा ‘मराठी माणूस एकवटवा’ हा संदेश अधिक प्रभावी ठरावा, यासाठीच राऊत यांना सध्या थोडे बाजूला ठेवले गेले असल्याची चर्चा आहे.
संजय राऊत यांचे पत्र आणि ‘राजकीय संकेत’
राऊत यांनी प्रसिद्ध केलेल्या पत्रात लिहिले आहे —
“माझ्या प्रकृतीत काही गंभीर स्वरूपाचे बिघाड झाले असून डॉक्टरांच्या सल्ल्यानुसार मला बाहेर जाणे आणि गर्दीत मिसळणे यावर निर्बंध आहेत. मी लवकरच ठणठणीत बरा होऊन नवीन वर्षात आपल्या भेटीस येईन.”
या पत्रातील “नवीन वर्षात भेटू” या वाक्यामुळेच निवडणुकीच्या काळात राऊत राजकीयदृष्ट्या सक्रिय राहणार नाहीत, असे संकेत मिळत असल्याचे निरीक्षकांचे म्हणणे आहे.
अंधारे यांची तोफ पुढे?
शिवसेना (उद्धव बाळासाहेब ठाकरे) पक्षाच्या उपनेत्या सुषमा अंधारे यांना आगामी काळात मोठी जबाबदारी देण्यात येणार असल्याची चर्चा आहे.
स्थानिक स्वराज्य संस्थांच्या निवडणुकीत राज्यभर प्रचार मोहीमेत अंधारे यांची तोफ वापरण्याचे धोरण ठाकरे बंधूंनी आखले असल्याचे बोलले जात आहे.
त्यामुळेच राऊत यांना ‘सबुरीचा सल्ला’ देण्यात आल्याचे, आणि त्यांनी वैद्यकीय कारण दाखवून पत्र प्रसिद्ध केल्याचे, राजकीय वर्तुळात मानले जात आहे.