मुंबई: पवनराजे निंबाळकर हत्याकांड प्रकरणाचा नुकताच न्यायालयीन निकाल लागला असून, मुख्य आरोपी माजी गृहमंत्री पद्मसिंह पाटील यांच्यासह सर्व नऊ आरोपींची न्यायालयाने निर्दोष मुक्तता केली आहे. या धक्कादायक निकालानंतर महाराष्ट्राच्या राजकीय वर्तुळात, विशेषतः ‘ऑपरेशन टायगर’बाबत मोठा ट्विस्ट निर्माण झाला आहे. ठाकरे गटाचे खासदार ओमराजे निंबाळकर हे शिंदे गटात सामील होणार असल्याच्या जोरदार चर्चा होत्या, मात्र या निकालानंतर आता ते एकनाथ शिंदेंची साथ सोडणार का? असा नवा प्रश्न उपस्थित झाला आहे.
नेमका पेच काय आहे?
पक्षांतराचा आकडा धोक्यात: जर ओमराजे निंबाळकर यांनी ‘ऑपरेशन टायगर’मधून माघार घेतली, तर शिंदे गटाला पक्षांतरासाठी आवश्यक असलेला दोन-तृतीयांश (2/3) खासदारांचा आकडा गाठणे कठीण होणार आहे. परिणामी, हे संपूर्ण ऑपरेशन अपयशी ठरण्याची शक्यता वर्तवली जात आहे.
खासदार ओमराजेंचे सूचक वक्तव्य: एका मराठी वृत्तवाहिनीशी बोलताना ओमराजेंनी स्पष्ट केले की, त्यांनी अद्याप कोणताही पक्ष सोडलेला नाही. दोन दिवसांत ते आपल्या मतदारसंघात जाऊन कार्यकर्त्यांशी चर्चा करतील आणि त्यानंतरच पुढील निर्णय घेतील.
निकालानंतर ओमराजे निंबाळकर काय म्हणाले?
न्यायालयाच्या निकालावर तीव्र नाराजी व्यक्त करत ओमराजे यांनी आपली पुढील भूमिका स्पष्ट केली. ”या निकालाचा आणि माझ्या पक्षांतराचा काहीही संबंध नव्हता. मी या अन्यायाविरुद्ध उच्च न्यायालयात (हायकोर्टात) दाद मागणार आहे. शिंदेसेनेत जाण्याबाबत मी अद्याप कोणताही अंतिम निर्णय घेतलेला नाही. मतदारसंघात जाऊन, कार्यकर्त्यांची भावना समजून घेऊनच काय तो निर्णय घेतला जाईल.”
राजकीय वर्तुळात धाकधूक वाढली
ओमराजे निंबाळकर यांच्या या सावध आणि संभ्रम वाढवणाऱ्या भूमिकेमुळे शिंदे गटात जाण्यास उत्सुक असलेल्या इतर खासदारांची धाकधूक चांगलीच वाढली आहे. ‘ऑपरेशन टायगर’ यशस्वी होणार की ओमराजेंच्या माघारीमुळे ते फिस्कटणार, याकडे आता संपूर्ण महाराष्ट्राचे लक्ष लागले आहे.