पुणे : भाजप आमदा नितेश राणे यांनी पुण्याच्या महापालिका आयुक्तांना त्यांच्या केबिनमध्ये जाऊन त्यांना थेट धमकी दिली होती. त्याच्या निषेधार्थ पुणे महापालिकेच्या कर्मचाऱ्यांनी आंदोलन करून नितेश राणे यांना चोख प्रत्युत्तर दिलं. आम्ही नागरिकांच्या हितासाठी काम करतो, तुमची दादागिरी इथे चालणार नाही, अंगावर आलात तर शिंगावर घेऊ, असं तिखट प्रत्युत्तर महापालिकेच्या कर्मचाऱ्यांनी नितेश राणे यांना दिलं.
भाजप आमदार नितेश राणे हे त्यांच्या आक्रमक भाषणामुळे नेहमीच चर्चेत असतात. मंगळवारी पुण्यात महापालिकेच्या बाहेर पुण्यातील पुण्येश्वर मंदिर मुक्तीसाठी हिंदुत्ववादी संघटनाच्या वतीने आयोजित आंदोलनामध्ये त्यांनी चिथावणीखोर भाषण केले. यावेळी त्यांनी अधिकाऱ्यांचं मुस्काट फोडण्याची भाषा करत त्यांना दम भरला. या सगळ्याविरोधात पुण्यातील महापालिका कर्मचारी आणि अधिकारी वर्गाने निषेध आंदोलन करत नितेश राणे यांना त्यांच्याच भाषेत प्रत्युत्तर दिलं.
नितेश राणे यांनी अधिकारी कर्मचाऱ्यांना धमक्या देऊ नये. ते जर अंगावर आले तर आम्हीही शिंगावर घेऊ. आम्ही नागरिकांच्या हितासाठी काम करतो, तुमची दादागिरी इथे चालणार नाही. शब्द जपून वापरा, अधिकारी कर्मचारी रस्त्यावर उतरले तर पाहा काय होईल, असा इशाराच त्यांनी नितेश राणे यांना दिला.
नितेश राणे काय म्हणाले होते?
घोडा हत्याराची भाषा आपल्याकडे नसते, आपण थेट कापतो. देश जर बाबासाहेबांनी लिहिलेल्या संविधानानुसार चालतो तर मग महापालिकेत खुर्च्या गरम करणाऱ्या अधिकाऱ्यांनी काम करणं गरजेचं आहे. त्यांची खुर्ची खेचायला आम्हाला जास्त वेळ लागणार नाही. अधिकाऱ्यांना कळायला हवं की आपण त्या खुर्चीवर का बसलो आहे? आम्ही जर कायदा हातात घेतला तर अधिकारी सुजून बाहेर येतील. आम्ही कायदा मोडलेला नाही. अधिकाऱ्यांनी कायदा तोडलेला आहे. देशात ८० टक्के हिंदू लोक राहतात, मग अधिकारी कशासाठी जिहादी लोकांचा लाड करतात?
बाबरीची एक वीट पाडावी, अशी माझी इच्छा होती. पण त्यावेळी शक्य झालं नाही. आता पुण्याचं प्रशासन मला ती संधी देईल. आपल्यावर केसेस होणार नाही कारण सरकार आपलं आहे, आम्ही काहीही केलं तरी केसेस होणार नाहीत. ज्या दिवशी तारीख जाहीर होईल त्यादिवशी कोणालाही फोन करायचा नाही, विचारायचं नाही, डायरेक्ट कार्यक्रम करायचा… विक्रम कुमार (महापालिका आयुक्त) तुम्ही माझ्या जंगलातून इथे आलात. आता यानंतर फक्त तारीख जाहीर होईल, मग इतिहासाला तयार राहा. कोणीही आमच्या धार्मिक स्थळाकडे वाकड्या नजरेने पाहिले तर दोन पायावर जाणार नाही याची तयारी ठेवा. त्यानंतर मला आणि महेश दादाला फोन करा आपला बॉस सागर बंगल्यावर बसलाय कोणालाही काही होत नाही, असं भडकाऊ भाषण नितेश राणे यांनी केलं.