अनंत नारंगीकर
उरण : दहा वर्षांपूर्वी करंजा गाव परिसरात शिरलेल्या बिबट्यानी दहशत निर्माण केली होती.मात्र आता पुन्हा एकदा केळवणे मध्ये बिबट्याचे दर्शन झाल्याने हा बिबट्या नेमका आला कुठून असा प्रश्न उपस्थित केला जात आहे.
उरण तालुक्यातील करंजा बंदर परिसरातील गावांमध्ये शिरलेल्या बिबट्यानी दहशत निर्माण केली होती.त्यानंतर गव्हाण फाटा कंटेनर यार्ड आणि वेश्वी, चिर्ले जंगलात बिबट्या वावरताना दिसला होता. मागील महिन्यात कर्णाळा पक्षी अभयारण्य परिसरातील दिघाटी, चिरनेर गाव परिसरातील जंगलात बिबट्याचा मुक्त संचार जाणवत होता.त्यासंदर्भात वन अधिकारी वर्गाने जनजागृती करण्यासाठी पुढाकार घेतला.मात्र सदर बिबट्याला जेरबंद करण्यासाठी पुढाकार घेतला नाही.
त्याचा फायदा उठवत सदर बिबट्या हा केळवणे गावातील नागरी वस्तीत संचार करीत असल्याचे रहिवाशांच्या निदर्शनास नुकताच आले.त्यामुळे नागरिकांमध्ये घबराटीचे वातावरण निर्माण झाले आहे.मात्र शिकारीच्या शोधात असलेला बिबट्या आला कुठून असा प्रश्न सध्या उपस्थित केला जात आहे.तरी नागरिकांनी सावधगिरी बाळगावी आणि बिबट्या समोर आला तर घाबरून न जाता दोन्ही हात उंच करून जोरजोरात ओरडत इतर नागरिकांना मदतीला बोलवावे असे आवाहन सध्या प्राणी पक्षी व सर्प मित्र विवेक केणी यांच्या कडून करण्यात येत आहे.