वैशाली कडू
उरण : राज्यातील सर्व नगरपरिषद, नगरपंचायतीमधील प्रदीर्घ काळापासून अनेक मागण्या प्रलंबित आहेत. त्या लवकरात लवकर पूर्ण होत नसल्याच्या निषेधार्थ दि. ३० ऑक्टोबरपासून महाराष्ट्र राज्य नगरपरिषद, नगरपंचायत कर्मचारी व संसर्ग कर्मचारी संघर्ष समितीचे सदस्य आमरण उपोषण करणार असल्याचे प्रसिद्धीस दिलेल्या पत्रकात नमूद केले आहे.
मुख्यमंत्री एकनाथ शिंदे यांच्याबरोबर विधानभवनात झालेल्या बैठकीत प्रदीर्घ काळापासून प्रलंबित असलेल्या मागण्यांवर सकारात्मक निर्णय घेण्यात आले होते. त्या निर्णयाची अंमलबजावणी वित्त विभाग, नगरविकास तसेच आयुक्त तथा संचालक, संचालनालय कार्यालयातही अनेक प्रश्न आजही प्रलंबित आहेत. त्याच्या निषेधार्थ येत्या दि. ३० ऑक्टोबर रोजी सकाळी १० वाजल्यापासून आयुक्त तथा संचालक, संचालनालय सीबीडी बेलापूर या कार्यालयासमोर महाराष्ट्र राज्य नगरपरिषद, नगरपंचायत कर्मचारी व संसर्ग कर्मचारी संघर्ष समितीचे सदस्य आमरण उपोषण करणार आहेत.
या आमरण उपोषणाबाबतची नोटीस व मागण्यांचे निवेदन सहाय्यक आयुक्त श्री. काकडे यांच्याकडे दि. १६ ऑक्टोबर रोजी राज्याचे कामगार नेते डॉ. डी. एल. कराड, संतोष पवार, अनिल जाधव, अशोक जाधव यांनी नवी मुंबई येथे दिले आहे.