मुंबई : घाईगडबडीने लोकलमधून उतरताना एखादी वस्तू, बॅग ट्रेनमध्ये विसरली तर ती पुन्हा मिळण्याची शक्यता तशी कमीच. पण, लोकल ट्रेनमध्ये विसलेले तब्बल २७२ ग्रॅम वजनाचे सोन्याचे दागिने एका प्रवाशाला परत मिळाले आणि त्याची दिवाळी गोड झाली. रेल्वे सुरक्षा दल आणि रेल्वे पोलिसांच्या मदतीने त्या प्रवाशाला हे हरवलेले सोने शोधून देण्यात आले.
अंबरनाथ-सीएसएमटी जलद लोकलमधून प्रवास करण्यासाठी या प्रवाशाने ट्रेनमध्ये प्रवेश केला. सोन्याचे दागिने असलेले पॅकबंद प्लास्टिकचा बॉक्स त्याने आसनांवरील रॅकवर ठेवला. बॉक्सवर २०२ ग्रॅम अशी खूण मार्करने करण्यात आली होती. कुर्ला रेल्वेस्थानकात गर्दी कमी झाल्यावर हा प्रवासी आसनांवर बसला. भायखळा स्थानकात फलाट क्रमांक दोनवर तो उतरला. मात्र लोकल रवाना झाली आणि तब्बल १२ लाख १५ हजार रुपये किंमतीच्या दागिन्यांची पिशवी आपण लोकलमध्येच विसरल्याचे या प्रवाशाच्या लक्षात आहे. प्रवाशाने तातडीने भायखळ्यातील स्टेशनमास्तरशी संपर्क साधला. लोकल सीएसएमटीहून परत आल्यावर पिशवी दिसत नसल्याचे पाहताच त्यांनी सीएसएमटी रेल्वे पोलिस ठाण्यात याबाबत तक्रार दाखल केली.
तक्रारीनंतर रेल्वे सुरक्षा दलासह रेल्वे पोलिसांच्या गुन्हे प्रकटीकरण शाखेचे पोलिसांनी दागिन्यांचा शोध सुरू केला. काही दिवसांच्या अधिक तपासात अंबरनाथमधील आरोपी हुसैन मुस्तफा हुसैन शेख यांच्या घरी ते पोहोचले. आरोपीकडे चौकशी करताच त्याने या दागिन्यांची चोरी केल्याची कबुली दिली. आरपीएफ आणि जीआरपी कर्मचाऱ्यांनी एकत्र काम करून काही दिवसांतच या प्रवाशाचे १२ लाखांचे सोन्याचे दागिने जसेच्या तसे ताब्यात घेत ते प्रवाशाला परत केले. आरपीएफ आणि जीआरपीच्या एकत्र तपासामुळे काही दिवसांतच सोन्याचे दागिने परत मिळाले. या सुरक्षा यंत्रणांमुळे यंदाची दिवाळी सोन्याची झाली, अशी भावना प्रवाशाने व्यक्त करत पोलिसांना धन्यवाद दिले. दरम्यान, आरोपीबाबत सीएसएमटी रेल्वे पोलीस ठाण्यात गुन्हा दाखल करण्यात आला असून पोलिसांकडून अधिक तपास करण्यात येत आहे.