मुंबई : ‘सुरक्षित आणि अपघात विरहित बस सेवा’, असे ध्येय एसटी महामंडळाचे आहे. ध्येय गाठण्यासाठी एसटी महामंडाळाने एसटी चालकांवर मोबाइल बंदी करण्याचा निर्णय घेतला आहे. एसटी चालवताना अर्थात बसच्या स्टेअरिंगवर बसण्यापूर्वी चालकाने आपला मोबाइल वाहकाकडे देणे बंधनकारक करण्यात आले आहे. एसटीच्या स्वमालकीच्या गाड्यांसह भाडेतत्वावरील वाहनांसाठीही हा नियम लागू राहणार आहेत.
राज्यात परिवर्तन (साधी), शयनयान, शयनयान कम आसनी, शिवनेरी, शिवाई, ई-शिवनेरी, अश्वमेध, हिरकणी, शीतल अशा श्रेणीतील एसटी गाड्या धावत्या आहेत. चालकांवरील मोबाइल बंदीचा नियम महामंडळाच्या स्वमालकीसह भाडेतत्वावरील अन्य गाड्यांनाही लागू राहणार आहे. निर्णयाची अंमलबजावणी सोमवारपासून करण्यात आली आहे. दोषी चालकांवर दंडात्मक कारवाई करण्यात येणार आहे, असे एसटी महामंडळाचे अध्यक्ष आणि व्यवस्थापकीय संचालक शेखर चन्ने यांनी सांगितले.एसटी चालकांनी स्थानक-आगारातून बस सुरू करण्यापूर्वी आपला मोबाइल वाहकाकडे जमा करणे बंधनकारक आहे. विनावाहक सेवा देणाऱ्या एसटीत चालकांनी आपल्या बॅंगेत मोबाईल ठेवावा. मोबाईलसह ब्ल्यूटूथ, इयरबड्, हेडफोन आणि अन्य तंत्रज्ञानाच्या वापरावरही महामंडळाने पूर्णपणे बंद घातलेली आहे.
एसटी बस चालवाताना मोबाइलवर बोलणे, व्हिडीओ पाहणे, मोबाइवर गाणी लावून ऐकणे यांमुळे चालकांची एकाग्रता भंग होते. एसटीमधून सुरक्षित वाहतूक सेवा दिली जाते. यामुळे चालकांनी वाहन चालनाच्या नियमांचे पालन करणे बंधनकारक आहे. बस चालवताना एसटी चालक मोबाइलचा वापर करत असल्याचे व्हिडीओ समाजमाध्यमांवर व्हायरल होतात. यामुळे एसटीची सामाजिक प्रतिष्ठा मलिन होऊन त्याचा गंभीर परिणाम एसटीच्या प्रवाशांवर होतो, यामुळे धोरणात्मक निर्णय घेतल्याचे महामंडळाने स्पष्ट केले आहे.
अशी लागू होणार बंदी
- मोटार वाहन कायद्यानुसार एसटी चालकांना मोबाइल बंदी
- दंडात्मक कारवाई करताना वाहन कायद्याचा आधार घेण्याची विभागप्रमुख, आगारप्रमुखांना मुभा
- एसटी चालवताना मोबाइल चालकाने वाहकाकडे द्यावा.
- विनावाहक सेवेत चालकांनी मोबाइल बॅगमध्ये ठेवावा.
- मोबाइलसह हेडफोन- ब्ल्यूटुथ सर्व उपकरणे वापरण्यावर बंदी आहे.
- भाडेतत्वावरील वाहनांवरही बंदी आदेश लागू
अचानक तपासणी
एसटीच्या सुरक्षा व दक्षता खात्यासह सर्व मार्ग तपासणी विभागांनी रोजच्या तपासणीत मोबाइल बंदीचीही तपासणी करावी. चालक मोबाइलवर बोलताना किंवा गाणी ऐकताना आढळल्यास त्यावर तातडीने कारवाई करावी. कारवाईचा विभागनिहाय अहवाल मुख्यालयाला पाठवावा, अशा लेखी सूचना मुख्यालयाने सर्व विभागांना दिल्या आहेत.