पॅरिस: भारताची कुस्तीपटू विनेश फोगटला अतिरिक्त वजनामुळे पॅरिस ऑलिम्पिकमधून अपात्र ठरवण्यात आले होते. ऑलिम्पिक समितीच्या या निर्णयावर विनेशने CASकडे याचिका केली होती. याबाबत आज युक्तीवाद होणार होता आणि आजच निर्णय अपेक्षित होता. मात्र आता आलेल्या अपडेटनुसार याचिकेवरील निर्णय आज न होता तो पॅरिस ऑलिम्पिक स्पर्धा संपण्याआधी दिला जाईल, असे एका प्रसिद्धी पत्रकातून सांगण्यात आले आहे. विनेशने मंगळवारी सलग ३ लढतीत विजय मिळवत अंतिम फेरीत प्रवेश केला होता. मात्र फायनल मॅच होण्याआधी तिचे वजन १०० ग्राम अधिक झाल्याने विनेशवर अपात्रतेची कारवाई करण्यात आली होती. यावर तिने याचिका केली होती.
विनेशची बाजू मांडण्यासाठी भारताकडून अॅड. हरीश साळवे यांची नियुक्ती करण्यात आली आहे. अपात्रतेच्या संदर्भात विनेशने दोन याचिका केल्या होत्या. त्यापैकी पहिली याचिका फेटाळून लावण्यात आली आहे, ज्यात तिने वजन पुन्हा करण्याची मागणी केली होती. दुसऱ्या याचिकेत विनेशने असे म्हटले होते की, अंतिम फेरीत तिने निश्चित वजनासह प्रवेश केला होता. त्यामुळे तिला किमान रौप्यपदक मिळाले पाहिजे.