पॅरिस : भारताच्या अमन सेहरावत १३-५ गुणांसह कुस्तीमध्ये कांस्यपदक जिंकले. भारतासाठी हे पॅरिस ऑलिम्पिकमधील सहावे पदक ठरले. भारताचा हा कुस्तीपटू ५७ किलो वजनी गटात कांस्यपदक पटकावण्यासाठी उतरला होता. अमनचा सामना यावेळी प्युएर्टो रिको देशाच्या डॅरियन क्रुझशी होता. अमनने सुरुवातीला २-१ अशी आघाडी घेतली होती. अमनने त्यानंतर ४-३ अशी आघाडी वाढवली होती. त्यांनतर अमनने ८-५ अशी आघाडी वाढवली.
अमनने या ऑलिम्पिकमध्ये दमदार कामगिरी केली होती. अमनने पहिल्या सामन्यात जोरदार आघाडी घेतली होती आणि हा सामना त्याने सहज जिंकला होता. त्यानंतर उपांत्यपूर्व फेरीत तर अमनने प्रतिस्पर्ध्याला एकही गुण मिळवू दिला नाही. अमनने या लढतीत १०-० असा दमदार विजय मिळवला होता. त्यामुळे अमनने उपांत्य फेरीत स्थान पटकावले होते.