मुंबई: भाजपचे ज्येष्ठ नेते आणि माजी खासदार किरीट सोमय्या यांच्या कथित अश्लील चित्रफिती समोर आल्यानंतर राजकीय वर्तुळात एकच खळबळ उडाली आहे. एका मराठी वृत्तवाहिनीने सोमवारी रात्री यासंदर्भात वृत्त दिले होते. त्यानंतर आज पावसाळी अधिवेशनाचा दुसरा दिवस किरीट सोमय्या यांच्या कथित अश्लील क्लिप्समुळे गाजला. विधानपरिषदेचे विरोधी पक्षनेते अंबादास दानवे यांनी आज या प्रकरणी सभागृहात आवाज उठवत किरीट सोमय्या यांच्यावर गंभीर आरोप केले. किरीट सोमय्या यांनी धमकावून किंवा भीती दाखवून काही मराठी भगिनींचे शोषण केल्याचेही आमच्या कानावर आल्याचा आरोप अंबादास दानवे यांनी केला. एवढेच नव्हे तर अंबादास दानवे यांनी किरीट सोमय्या यांच्या व्हिडीओ क्लिप्स असलेला पेनड्राईव्ह सभापती नीलम गोऱ्हे यांच्याकडे सुपूर्द केला. यानंतर राज्याचे गृहमंत्री देवेंद्र फडणवीस यांनी या प्रकरणाची उच्चस्तरीय चौकशी करण्याची घोषणा केली होती.
देवेंद्र फडणवीस यांच्या या घोषणेनंतर आता राज्य महिला आयोगही किरीट सोमय्या व्हिडीओ प्रकरणात सक्रिय झाला आहे. यासंदर्भात राज्य महिला आयोगाच्या अध्यक्ष रुपाली चाकणकर यांनी प्रसारमाध्यमांशी संवाद साधला. यावेळी त्यांनी म्हटले की, किरीट सोमय्या यांचा आक्षेपार्ह अवस्थेतील व्हिडीओ प्रसारित झाल्यानंतर अनेक सामाजिक संस्थांनी महिला आयोगाकडे यासंदर्भात विचारणा केली. त्यानंतर महिला आयोगाकडून मुंबईच्या पोलीस आयुक्तांना पत्र पाठवण्यात आले आहे. या प्रकरणाची लवकरात लवकर चौकशी करुन वस्तुस्थिती दर्शक अहवाल सादर करण्याच्या सूचना महिला आयोगाकडून पोलिसांना देण्यात आल्या आहेत. त्यामुळे आता मुंबई पोलीस किरीट सोमय्या व्हिडीओ प्रकरणाचा अहवाल कधी सादर करणार, याची उत्सुकता सर्वांना लागली आहे. आतापर्यंत महिला आयोग संबंधित महिलांनी तक्रार केल्यास आधारे कारवाई करतो. काही प्रकरणांमध्ये स्युमोटो तत्त्वावर कारवाई केली जाते. त्यामुळे आता मुंबई पोलिसांचा अहवाल आल्यानंतर पुढे काय करायचे, याचा निर्णय घेतला जाईल, असे रुपाली चाकणकर यांनी सांगितले.