विन्हेरे विभागातील मराठा समाज आक्रमक
मिलिंद माने
महाड : नायक मराठा समाज सेवा संघ विन्हेरे विभागाकडून फाळकेवाडी येथील येथे रविवार, २ फेब्रुवारी रोजी महिला हळदी कुंकू समारंभ मेळावा आयोजित केला होता. या आशयाचा बॅनर विन्हेरे येथील झोलाई मंदिर देवीच्या साने वर लावण्यात आला होता. मात्र, रात्री अज्ञातांकडून हा बॅनर फाडल्याने विन्हेरे विभागासहित महाड तालुक्यात या घटनेचा निषेध करून आणि विरोधात कारवाई करण्याची मागणी मराठा नायक समाजाने केली आहे.
नायक मराठा समाज सेवा संघ विन्हेरे विभागामार्फत फाळकेवाडी येथील हनुमान मंदिरामध्ये रविवार, २ फेब्रुवारी रोजी महिला हळदी कुंकू समारंभ व मेळावा आयोजित केला होता. यासाठी महाडसह तालुक्यातील विविध विभागातून मोठ्या प्रमाणावर महिला या कार्यक्रमासाठी येणार होत्या. त्यासाठी विन्हेरे येथील झोलाई मंदिराच्या सानेवर हा बॅनर शुक्रवारी सायंकाळच्या सुमारास लावण्यात आला होता. मात्र, शुक्रवारी मध्यरात्री अंधाराचा फायदा घेऊन अज्ञात व्यक्तीने जाणीवपूर्वक हा बॅनर फाडून पळवून नेला.
याबाबतची घटना शनिवारी सकाळी लक्षात आल्यानंतर मराठा समाज आक्रमक झाला असून या घटनेच्या निषेधार्थ त्यांनी अज्ञात व्यक्तीच्या विरोधात निषेध व्यक्त करीत महाड तालुका पोलीस ठाण्यात याबाबत गुन्हा दाखल करण्यास सांगितले असून संबंधित अज्ञात व्यक्तीचा तपास लावण्याचे काम पोलिसांपुढे उभे ठाकले आहे. याबाबत विन्हेरे येथे नायक मराठा समाजाच्यावतीने बैठक घेऊन या घटनेचा निषेध व्यक्त केला व महाड तालुका पोलीस ठाण्यात याबाबत गुन्हा दाखल करण्यातसाठी तक्रारी अर्ज दाखल केला आहे. या बैठकीसाठी तालुका उपाध्यक्ष सिताराम कदम, अध्यक्ष पांडुरंग पवार, उपाध्यक्ष सुरेश सपकाळ, उपाध्यक्ष नामदेव साळुंखे, उपाध्यक्ष प्रभाकर गायकवाड, सचिव अनंत सावंत, सदस्य संदीप वारंगे, खजिनदार बाळकृष्ण जाधव, फाळकेवाडी सरपंच उमेश फाळके, नागेश फाळके, विजय शिंदे, तालुका कृषी समितीचे अध्यक्ष किशोर फाळके, माजी जिल्हा परिषद सदस्य निलेश ताठरे ,विन्हेरे सरपंच चंद्रकांत मोरे, पांगरीचे माजी सरपंच राजेंद्र मोरे, ताम्हणे गावचे माजी सरपंच सुनील बोरकर आदी सदस्य बैठकीस उपस्थित होते. या बैठकीनंतर निषेध करून संबंधित कृत्य करणाऱ्या व्यक्तीला तात्काळ शासन करण्याची मागणी तालुका पोलीस ठाण्याकडे केली आहे.