मुंबई : मुंबईतील मुलुंड येथील एका सोसायटीत मराठी महिलेला ऑफिससाठी जागा देण्यास नकार दिल्याचा प्रकार समोर आला होता. सोशल मीडियातून ही घटना समोर आल्यानंतर मनसे कार्यकर्त्यांनी सदर परिसरात जात सोसायटीच्या सचिवांना माफी मागण्यास प्रवृत्त केले. त्यानंतर आता मनसे अध्यक्ष राज ठाकरे यांनीही घर नाकारण्याच्या घटनेवरून संताप व्यक्त केला असून सोसायटीला धडा शिकवणाऱ्या मनसे कार्यकर्त्यांना शाबासकी दिली आहे.
सोशल मीडियातून आपल्या भावना व्यक्त करताना राज ठाकरे यांनी म्हटलं आहे की, ‘मुंबईत, मुलुंडमध्ये एका मराठी स्त्रीला, ती मराठी आहे म्हणून व्यवसायासाठी जागा नाकारल्याची घटना समोर आली. इतरांनी निषेध वगैरे व्यक्त केला. आम्हाला निषेध नोंदवणं इत्यादी प्रकार माहीत नाहीत. त्यामुळे माझ्या महाराष्ट्र सैनिकांनी आमच्या पद्धतीने दम दिल्यावर त्या बिल्डिंगच्या सचिवाने माफीनामा दिला. हे असले प्रकार खपवून घेतले जाणार नाहीत. मुंबईत, महाराष्ट्रात जर पुन्हा हे असं काही घडलं तर गालावर वळ उठतील हे निश्चित,’ असा आक्रमक इशारा राज ठाकरेंनी दिला आहे. तसंच सरकारने पण जरा आपला धाक दाखवला पाहिजे, असं राज ठाकरेंनी म्हटलं आहे.
मुलुंडप्रकरणी आपल्या कार्यकर्त्यांचं अभिनंदन करत राज ठाकरे यांनी त्यांना एक आवाहनही केलं आहे. ‘काल मुलुंडमध्ये माझ्या महाराष्ट्र सैनिकांनी जाऊन जी समज दिली त्यांचं मनापासून अभिनंदन. तुमचं कायम लक्ष असतंच आणि मराठी माणसावर कुठेही अन्याय झालं तर त्याला महाराष्ट्र नवनिर्माण सेनाच आठवते. हे असंच सुरू राहिलं पाहिजे. अन्याय दिसेल तिथे तुमची लाथ बसलीच पाहिजे,’ असं राज म्हणाले.
पोलिसांकडून गुन्हा दाखल
आम्ही मराठी लोकांना व्यवसायासाठी जागा देत नाही, असं सांगत मुलुंडमधील सोसायटीच्या सचिवांनी तृप्ती देवरुखकर या महिलेला सांगितलं. तृप्ती यांनी घडलेल्या प्रकाराची माहिती सोशल मीडियाद्वारे दिल्यानंतर सर्वत्र तीव्र प्रतिक्रिया उमटल्या. याप्रकरणी काल पोलिसांनी गुन्हा नोंद केला आहे. राज्य महिला आयोगाच्या अध्यक्षा रुपाली चाकणकर यांनी याबाबतची माहिती दिली.