मुंबई : शेतकरी कामगार पक्षाचे माजी आमदार विवेक शंकर पाटील यांच्या तब्बल १५२ कोटी रुपयांच्या मालमत्तेवर सक्तवसुली संचालनालयाने (ईडी) टाच आणली आहे. त्यामध्ये प्रामुख्याने स्थावर मालमत्तांचा समावेश आहे. बनावट कर्ज खात्यांद्वारे केलेल्या ५६० कोटी रुपयांच्या कथित घोटाळ्यात ही कारवाई करण्यात आल्याचे ईडीने म्हटले आहे.
ईडीने २०१९मध्ये मुंबई पोलिसांच्या आर्थिक गुन्हे विभागाने नोंदविलेल्या एफआयआरप्रकरणी ही कारवाई केली. पनवेलच्या कर्नाळा नागरी सहकारी बँक लिमिटेड या बँकेच्या २०१९-२०मध्ये केलेल्या लेखा परीक्षणानंतर हा घोटाळा उडघकीस आला. त्यावेळी बँकेचे अध्यक्ष स्वत: विवेक पाटील होते. बँकेतील ६७ बनावट कर्ज खात्यांद्वारे बँकेतील निधी पाटील यांनी त्यांच्याच मालकीच्या किंवा नियंत्रित असलेल्या संस्था, कंपन्या, ट्रस्टच्या कर्ज खात्यांकडे वळवला. त्यामध्ये कर्नाळा चॅरिटेबल ट्रस्ट, कर्नाळा स्पोर्ट्स अकादमी, कर्नाळा महिला रेडीमेड गारमेंट्स कोऑपरेटिव्ह सोसायटी लिमिटेड यांचा प्रामुख्याने समावेश होता. हा निधी ५६० कोटी रुपये इतका होता. याद्वारे पैशांचा गैरवापर झाल्याने मनी लॉन्ड्रिंग गुन्ह्यांतर्गत ही कारवाई केल्याचे ‘ईडी’तील सूत्रांचे म्हणणे आहे. टाच आणलेल्या मालमत्ता या प्रामुख्याने विवेक पाटील यांचे नातेवाईक आणि कर्नाळा महिला रेडीमेड गारमेंट्स कोऑपरेटिव्ह सोसायटी लिमिटेड यांच्या मालकीतील आहेत. त्यामध्ये विस्तीर्ण जमीन, बंगला, निवासी संकुल इत्यादींचा समावेश असल्याचे ईडीने म्हटले आहे.
‘ईडी’ने १५ जून २०२१ ला विवेक पाटील यांना अटक केली होती आणि सध्या ते न्यायालयीन कोठडीत आहेत. १२ ऑगस्ट २०२१ रोजी त्याच्या आणि बँकेविरुद्ध मनी लॉन्ड्रिंगच्या गुन्ह्यासाठी तक्रार दाखल करण्यात आली आहे. १७ ऑगस्ट २०२१ला पाटील व त्यांच्या कुटुंबातील सदस्य आणि त्यांच्या संबंधितांच्या २३४ कोटी रुपयांच्या मालमत्तांवर याआधीच टाच आणली गेली आहे.