पिंपरी : पिंपरीचे राष्ट्रवादीचे आमदार आणि विधानसभेच्या उपाध्यक्षपदी निवड झालेल्या अण्णा बनसोडे यांच्या सत्काराच्या कार्यक्रमाचे आयोजन करण्यात आले होते. त्या कार्यक्रमाला शिवसेना (उद्धव बाळासाहेब ठाकरे) गटाचे नेते संजोग वाघेरे यांनी हजेरी लावली होती. त्यामुळे संजोग वाघेरे हे उपमुख्यमंत्री अजित पवार यांच्या नेतृत्वातील राष्ट्रवादी काँग्रेमध्ये प्रवेश करतात की काय, अशा चर्चा आता सुरु झाल्या आहेत.
संजोग वाघेरे यांची राजकीय सुरुवात ही राष्ट्रवादी काँग्रेसमधूनच झाली. त्यांचे सर्व कुटुंब हे राष्ट्रवादीसोबत होते. त्यांनी राष्ट्रवादीत असताना पिंपरी चिंचवड शहरातील अनेक महत्वाची पदे भूषविली आहेत. याशिवाय अजित पवार यांचे निकटवर्तीय म्हणून त्यांची ओळख देखील आहे. मात्र, २०२४ च्या लोकसभा निवडणुकीपूर्वी त्यांनी राष्ट्रवादीला रामराम ठोकत उद्धव ठाकरे यांच्या शिवसनेत प्रवेश केला होता. त्यांनी लोकसभा निवडणूक देखील लढवली. मात्र त्यांना यश आले नाही. आता पुन्हा एकदा संजोग वाघेरे सक्रिय झाल्याचे पाहायला मिळत आहे. पिंपरीचे आमदार अण्णा बनसोडे यांची विधासभेच्या उपाध्यक्षापदी निवड झाल्यानंतर त्यांचा पिंपरी चिंचवड येथील भक्ती शक्ती येथे जंगी स्वागताच्या कार्यक्रमाचे आयोजन करण्यात आले होते. त्यावेळी ठाकरे गटाचे नेते संजोग वाघेरे यांनी हजेरी लावल्याचे पहायला मिळाले होते. त्यामुळे संजोग वाघेरे पुन्हा एकदा स्वगृही येणार अशा चर्चा आता सुरु झाल्या आहेत.
संजोग वाघेरे यांनी माध्यमांशी बोलताना सांगितले की, आमदार अण्णा बनसोडे यांना संविधानिक पद मिळाले आहे. त्यामुळे त्यांच्या स्वागतला जाणे काही गैर नसून माझी राजकीय भूमिका वेगळी आहे. तसा विचार मी अद्याप केला नसल्याचे देखील त्यांनी सांगितले आहे. मात्र, संजोग वाघेरे यांच्या राष्ट्रवादीतील कार्यक्रमाच्या उपस्थितीने अजितदादांनी आपल्या बालेकिल्ल्यात पुन्हा एकदा लक्ष देण्यास सुरुवात केल्याच्या चर्चा आता होऊ लागल्या आहेत. आगामी महापालिका निवडणुकीच्या दृष्टीने ही पाऊले उचलली जात असल्याचे बोलले जात आहे. त्यामुळे राष्ट्रवादीकडून जुन्या सहकाऱ्याला पुन्हा स्वगृही आणण्याच्या चर्चा आता सुरु झाल्या आहेत.